أشرف!!!!
أشرف ده العريس الاخير اللى حكيتلكوا عنه
هوة النموذج اللى كنت بحلم بيه طول عمرى
هوة النموذج اللى كنت بشوفه فى مودى
هوة اللى كنت بحلم أنى أعيش معاه
أول لقاء كان عبارة عن تعارف
كنت أنا وبابا وأشرف بس
حتى مماما محضرتش اللقاء ده
وكنت مش مصدقه نفسى
بقيت أقول لربنا
يارب
يارب
ده كتيييييييييير أوى عليا
أوصفلكوا اشرف؟؟؟
هوة عنده 30 سنه
طويل
متدين جدا جدا
ملتحى
ملتزم جدا
محترم جدا
شيك
من أسرة طيبه وبيت طيب
يعنى ديه الصفات اللى عرفتها عنه
وحصل قبول من أول مرة
مع أننا متكلمناش كتير
بس كنا بنكلم عن كلياتنا
وجامعه القاهرة
ومواقف حصلتلنا
يعنى كلام عام جدا
بس برضوا حصل قبول
وتانى يوم
أشرف أتصل ببابا
وطلب منه أنه ييجى تانى
وفعلا تمت المقابله
كنت سعيده
ولكن تانى مقابله
أبتدى يسألنى أسئله غريبه جدا
حسيت أنى مش قدام عريس
لا
كنت حاسه أنى بعمل أنترفيو فى بنك
أسئله موجهالى بشكل مباشر
من نوعيه
أيه هوة طموحك وهدفك فى الحياة؟؟
شايفه حياتنا بعد كده حتكون أزاى؟؟؟
أيه رأيك فى النقاب والأسدال؟؟؟
أزاى يكون الانسان ناجح؟؟؟؟
......
وأتضح بعد كده أنه حافظها من على النت
يعنى تحت مسمى
أعرف شخصيه خطيبتك
مع أنى جاوبت على كل الاسئله بطلاقه
بس ساعتها حسيت بوغل فى صدرى
بقيت أقول جوايا هوة فى أيه؟؟
وأنا أصلا بكره الاسئله المطلقه
ومش بحب أجاوب عليها
وفى نهايه القاعده
طلب أنه يجيب مامته معاه المرة الجايه عشان يتقدم رسمى
وأنا طبعا برضوا فى الفترة ديه مستمرة فى الاستخارة
كل يوم وحتى مع كل صلاه
وطول النهار أقول الدعاء
والفترة ديه حسيت بمشاعر
عمرى فى حياتى محستها
حسيت بحق اللجوء الى الله
حسيت أنى فعلا وكلت ربى فى الموضوع ده
مش عارفه ليه فى الفترة ديه
قربت لربنا أوى أوى أوى أوى
مش عارفه ايه السبب
وأبتديت أحافظ على نوافل كنت نفسى أعملها
بس مكنتش عارفه
المهم جه ومعه أمه وأخته وأخته التانيه
و كانت أمه سيده كبيرة فى السن
تشبه الاتراك
طيبه بشكل غرييييييييييييييييييب
حنونه
تفكرك كده بالستات بتاعت زمان
الستات الطيبين اللى ملهومش فى حاجه
أول ما شافتنى
عينيها دمعت
وأخدتنى فى حضنها
وأخواته برضوا
كانوا طيبين جدا جدا
المهم قعدنا
وبدأنا نتكلم كلنا
وكانت أخته قاعده جمبى
وكانت لطيفه جدا
قعدنا تنكلم كتير
وفى وسط الكلام
قالتلى
ممكن أسألك سؤال؟؟
فى مشكله أن ماما تقعد معاكو
قلتلها لا طبعا
أنا أكون سعيده جدا جدا
ديه زى ماما بالظبط
ومش معقول بعد العمر ده كله
كلكوا تتخلوا عنها
أنا ححطها فى عنيا
المه مش عايزة أطول عليكوا
وأرهققوا بالتفاصيل
انتهت المقابله
ووأنا بسلم على أمه قبل ما تمشى
وطيت على أيديها وبوستها وقولتلها أنا بنتك وانتى حوة عنيا الاتنين
المهم الموضوع كان ماشى عادى جدا
وبابا كان متواضع جدا جدا فى طلباته
يعنى قاله الشبكه ديه هديه
وهيه حتى هيه مش حتنزل تنقيها أصلا
والشقه حنجهزها مع بعض
وكده يعنى مكنش فى مطالب لينا خااااااااااالص
ومع أن الموضوع كان ماشى تمام
بس أنا كنت أعانى من أنقباض دائم فى صدرى
لدرجه أنى مكنتش بنام
على طول حاسه أن قلبى مقبوض
قلبى واجعنى
مش عارفه ليه؟؟؟
المهم بعد ما بابا قسم مكونات منزل الزوجيه
وأشرف كان سعيد جدا بالتقسيمه خصوصا أن أبى كان رجيم جدا بيه
وكان أصلا متساهل معاه عشان كان معجب بيه
المهم أبتدينا بقى فى الشغل التمام
جه لبابا وقالله أنا مش معايا فلوس
فبابا قاله طيب وبعدين
أعمل أيه يعنى
؟؟
على العموم يا أبن الناس لما تجهز أبقى تعالى
وأنا بيتى مفتوحلك
وكانت أخر مرة أشوف أشرف
خرج بلا عوده
وطبعا الموضوع كان فى تفاصيل كتير مش حقدر أحكيهالكوا عشان مش عايزة أجرًح فى حد
مامته الملاك الطاهر
أهانتنى انا وامى أهانه فظيعه
ولم يشفع لى تقبيلى ليديها
ومعاملتى الحسنه لها
ولا تضحيتى بحريتى مقابل الاعتناء بها وعدم تركها تعيش بمفردها
المهم الموضوع ده
فتح عينى على حاجات كتيييييير اوى
فتح عينى على طيبتى الذايده فى التعامل مع الناس ديه
طاعتى الكامله لاشرف
كل ده مشفعليش
تساهل أبى معاه
مشفعليش
تخلى عنى
تماما
زى الاخ مودى كده تمام
يبدو أنى موعوده
مليش حظ مع النوع البشرى ده
ههههههه
بس أنا مش زعلانه أن الموضوع ده أنتهى
عارفين ليه
لانى تأكدت تماما أن الناس مش بمظهرها
مش بأشكالها
الموضوع بكل ما فيه أخذت منه درس كبيييييييييييير
حسيت أن ربنا بعتلى الموضوع ده مخصوص عشان يأدبنى
يعرفنى حقيقه الناس
خبرة
ملهاش أول من أخر
ورجعت تانى
سوسا بس
من غير حد معاها
سوسا الوحيده
الموضوع فعلا أزمنى نفسيا بكل تفاصيله
بس كان فعلا مع العسر يسرا
حسيت بحب كل الناس اللى حوليا
أصحابى
أقاربى
كل اللى حوليا
أمى أمى حبيبتى
أحتضنتنى بشكل
أسألى الله العظيم رب العرش العظيم أن يرضى عنها ويسعدها يجازيها خير على كل اللى عملته معايا
أختى كمان
كل الناس
ومكثت فى صدمه معرفتى بالناس على حقيقتها لاول مرة
الى أن بدأت أستعيد نفسى
وأحوًل كل زكرى سيئه لخبرة ودرس مستفاد
ومنكرش ان الموضوع ده بتفاصيله سببلى أزمه نفسيه الى يومنا هذا
بس مع كل العذاب اللى أتعذبته بسبب الموضوع ده
ربنا أدانى شىء أفضل وأحسن ميت مرة
مضيت أيام ليلا مع ربى وحدى أشكيه وأناجيه
كنت أشعر وقتها بأحاسيس
مش سهل أنى أحسها تانى
كنت بتمنى أن الناس تنام بقى عشان أبقى مع ربنا لوحدى
وبدأت أبعد عن مواضيع الزواج ديه كلها
وبدات أتفرغ لاشياء أهم
بدأت أتفرغ لسوسا
حياه سوسا
مستقبل سوسا
شغل سوسا
أه حشتغل
وحقدم فى أحست مكان وحذاكر
وأن شاء الله حنجح
وبدأت أخطوا أولى الخطوات نحو مستقبلى
حياتى
شخصى أنا
وللحديث بقيه
سلاااااااااااااااااااااام
المشاركات
هناك 39 تعليقًا:
اول كومنت
مفروض بعد كا يبقي بفلوس
هههههههههههههههههه
مش عافه اقول ايه
كلامك صعب اوي
بس تعرفي الحمد لله انك عرفتي اشرف دا ع حقيقته من الاول
لو كان حصل جواز وكدا كان هيبقي حاجه تانيه
كنتي هتتبهدلي كتير اوي
وزي ما عملتي تشكري ربنا
ودا اكيد درس
احسن حاجه عملتيها انك تتفرغي لمستقبلكا وبس
حياتك انتي
ربنا يوفقك يارب
ربنا يبعد عننا
اي حد من امثال اشرف
تحياتي ليكي
اى دة احنا هنعلق وانتى هتنفضى ومش هتردى على التعليقات ولا اى؟
متردى على تعليقات الموضوع اللى فات يا هانم
وبخصوص الموضوع دة
شوفى
مع انك بتقولى حاجات كتير غلط
بس انتى المرة دى قولتى كلمة حلوة اوى ان لناس مش بالشكل
تماااااااااااام
الناس مش بالكش لا بالفعل
وزى منتى شوفتى اممه دى طلعت عامة ازاى بعد كدة
وعلى فكرة معظم الستات كدة
بتلاقيها فى اول مرة وفى بداية التعارف بتبقى عاملة فيها مكسورة الجناح وبتطلع فى الاخر بنت ستين كلب
انا اختى حصل معها كدة برضه
وعلى فكرة الحاجات دى هتعلمك متتصدميش من الحاجات التافهة بعد كدة
وهتخليكى عقلانية اكتر وبتوزنى الامور صح مش هتاخدى بالشكل ومش هتبلغى فى ردود افعالك
انا سرحت وتكتب موضوع مش تعليق صح؟
معلش بقى اسف
تحيااااتى
مش عارف
انتى لخبطينى اوى يا سوسا
طيب ليه؟
بس تصدقى؟
فيه حاجات كتير ماينفعش نقول فيها ليه
لازم نقول قدر الله وما شاء فعل
نفسى ربنا يكتبلك الخير والله يا سوسا وبدعيلك من غير حتى ما اعرفك
Zoza
أنا فعلا بحمد ربنا وبعد مرور الوقت
حسيت أنى كنت عبيطه أنى كنت زعلانه ساعتها
وحسيت وتأكدت بالادله القاطعه أن ده مكنش خير ليا
الحمد لله
Ahmed
بص بقى حاسه كده أنك أخويا الصغير اللى عمالين نتناقر
بس بفرح جدا لما بشوف تعليقك
أه والله والله
وأنا أصلا الدى أس ال
مش عارفه باين أنفجر مش عارفه ولا أيه؟؟
وقعدت حوالى 5 أيام من غير نت
كنت حاسه أنى فى صحراء ضلمه من غير حتى بصيص نور
وبعدين أمبارح بس
فتحت وكتبت بوست جديد
وطبعا قريت تعليق جنابك
ونقدك ليا عشان الميك أب
بص يا أحمد
أنت باين فهمت الموضوع غلط
أنا مش بحط بالشكل اللى أنت فاهمه ولا اللى بتشوفه عندك فى شارع القوميه على البنات يوم الخميس والمهازل اللى عندكو
الموضوع شويه كحل على روج لونه روز ومش باين أصلا
مش زى ما أنت فاهم
انا بابا متشدد جدا جدا
واصلا لو لاحظ عليا ميك اب زايد ممكن يبهدل الدنيا
بس عشان الموقف يعنى
عريس ومامته وكده
مش معقول أغسل وشى وأدخل كده يعنى
بس شويه تظابيط
تانى حاجه بقى
أيه الحاجات الغلط الكتير اللى أنا بقولها بقى؟؟؟؟؟
عايزة أعرف
أتفضل
ولك مطلق الحريه فى النقض
ماشى يا أحمد
ماشى؟؟
بقى أنا بقول حاجات كتير غلط
؟؟؟
وبالنسبه للبوست ده
فعلا أنا بقيت دلوقتى أعقل كتيييييير
حسيت أنى أقدر أوزن الامور
لية نظرة فى اللى قدامى
كمان التجربه ديه علمتنى أزاى أتعامل مع الناس
الحمد لله
هيه فعلا كانت تجربه مريرة بس خرجت منها فعلا فايزة
وعندى خبرة كبيرة
الحمد لله رب العالمين
وبطل يا أحمد نقض فيا أحسنلك
ههههههه
لحسن أدخل مدونتك وأنت عارف بقى ممكن أعمل أيه
هههههههه
سلاااااااااام
وأدينى رديت على تعليقك ده واللى فات كمان
ويتهيألى ده أكبر تعليق فى تاريخ المدونات أصلا
هههههههههه
blue-wave
فعلا فى حاجات كتير مينفعش نقول ليه
والموقف ده كان أليم بالنسبالى بس الحمد لله أستفدت منه كتيييييير أوى
مش قادرة أقولك أستفدت قد أيه؟؟
الحمد لله
بس هوة أيه اللى لخبطت فى اللى قولته؟؟
وجازاك الله خيرا على دعائك لى
وربنا يجازيك خيرا من هذا الدعاء
ومتنساش أن فى ملك أن شاء الله أمن على دعائك
وقالك ولك بالمثل
أن شاء الله ربنا يكتبلك الخير ويقسملك الخيرات أن شاء الله
جازاك الله خيرا
وسعيده جدا بمتابعتك ليا
يااااااااااه يا سوسا
انا عارفه ازاى الواحد بيتعب لما يحط امله كله على حاجه و يصبر نفسه ان ده عوض ربنا و بعدين يقع على جدور رقبته
بس و لا يهمك بكره عوض ربنا هيجيلك فعلا و لغايه الوقت ده كل يوم هتتعلمى اكتر و اكتر
انتى المفروض تحمدى ربنا الفمرة انه خلصك من البنى ادم ده من اولها
واكيد ربنا كان عاوز يقويكى ويزريكى نوع معين من اليشر
يعنى فى الاخر اعتبرى دا درس فيزبا رخم وامتحان ارخم ونجحتى فيه
تمنياتى بكل الحب والسعاده
سمسم
2008
السلام عليكم
جميل اوي إنك بتحاولي اول بأول تخرجي اللي جواك من أفكار و تعرفي آراء الناس فيها و بالأخص لو كانت بمثابة فضفضة عشان تفرجي عن نفسك ولو بجزء بسيط
أولا شعورك بالخوف و التردد تجاه أي شخص متقدم لطلب يدك شيئ طبيعي سواء كان فيه قبول أو لأ لأنك بتطري لأخذ أصعب قرارات حياتك وهي بناء المستقبل ايوه المستقبل بيد الله وحده لكن لابد من الأخذ بالأسباب
ثانيا لا تندمي علي شيئ صدر منك إلا إذا كان شيئ سيئ و ضار أما لو أنه شيئ فعلتيه بغرض التعاطف و الحب فلا تندمي أبدا و أقصد معاملتك لوالدة المتقدم لطلب يدك لأنك فعلتيه برضا منك دون إهانه و دون طلب منها
ثالثا أحييك علي هذا القرار فالبفعل لقد استفدتي من التجربة حسيا و معنويا
فأنت أصبحت أقرب إلي المولي تعالي و أيقنت أنه لابد الإنتباه لبناء مستقبلق
برافو يا سوسا برافو
و إن شاء الله العريس اللي جاي يكون إنسان بكل ما تحمله الكلمة من معني و يكون جاهز و نيجي المرة الجاية نبارك و البنات تزغردلك إن شاء الله
مع تحياتي
ربنا يوفقك فى حياتك الجديدة وحاولى الا تنظرى الى الماضى واللى حصل ده كان مش اكتر من تجربة لكى تستفيدى منها
لا تيئسى واصبرى
ان شاء الله ربنا هيعوضك باحسن منه
تحياتى
Cold Air
بجد مش عارفه أقول أيه على الكلام الجميل والنصائح الغاليه
فعلا الواحد لازم لما يتعرض لصدمه
بعد ما ربنا يكرمه ويفوق لازم يراجع نفسه ويفكر فى التجربه كويس
وكمان يتعلم من كل موقف حصل فى حياته ويطلع منه بخبرة أو تجربه
بجد سعدت بمرورك جدا جدا
عروسه ننوسة
مرسى على شعورك النبيل وكلامك الرائع
ونصائحك الغاليه
فعلا أنا مش زعلانه من تجربه أستفدت منها مهما كانت مؤلمه
الحمد لله
وسعدت بمرورك يا نوسا
الله انتى رقيقه اوى بجد وكلامك كدا بيريح القلب انا اول مره ازور مدونتك وان شاء الله مش الاخيره وربنا يكتبلك الخير يارب
مش عارفه اقولك ايه بس اكيد مش كل الناس بتقابل الاحسان بالاساءه لكن ده مش معناه اننا ما نأخذش حذرنا و نأخذ بالنا و نفهم اننا ما نحكمش على الناس بسرعه و كمان ما نقدمش تنازلات قبل ما نتأكد ان الناس دى تستاهل ..
المهم انك دلوقتى صح جدا فعلا لازم تهتمى بنفسك و بمستقبلك و سيبى النصيب ده لربنا سبحانه و تعالى ان شاء الله يرزقكى كل السعاده و يرزقكى بمن يسعدك و تسعديه .. المهم انك تنجى فى انك تحققى طموحاتك الشخصيه و العمليه و ربنا معاكى و يوفقك ان شاء الله
دمتى بكل خير و سعاده
تقديرى و تحياتى
اة منك انتى ..... لو اطول اطلع الكلام من دماغك بدل مانتى عمالة تنقطينا بية كدة يا سوسا :))
بص يا سوسا طول ماحنا ماشيين فى الحياة بنتعلم و بنتجرح و لولا الجرح ماكناش هنتعلم ..رب ضارة نافعة ..ربنا يكرمك يا رب و يرزقك الخير دايما و ينور بصيرتك
سوسا
مش عارفة اقولك ايه
بس كان اول حاجة تعمليها
انك تصلى ركعتين شكر لربنا
انه نجاكى من الجماعة دول
والله ربنا بيحبك فعلا
ومش رايد ليكى بحاجة وحشة
وان شاء الله ربنا يكرمك باحسن منه
وتعيشى حياة زوجية سعيدة
ومش تخلى حاجة تأثر عليكى
ولا تدايقى والله فعلا ربنا بيحبك
وان شاء الله هيكرمك
دمتى بخير وسعادة دائما
البروفايل بتاعك فية شجن عميق.. يا ترى لية؟؟؟
سمر الشافعى
بجد والله أنتى نورتينى
وأوعى متجيش كل بوست أنا حستناكى
وربنا يكرمك أنتى كمان
ويسعد أيامك ياااارب
ٌRovy
Rovy
مرسى يا جميله على النصائح الغاليه
وفعلا كلامك صح
وأنا يا بنتى خلاااص بدأت التنفيذ
وربنا يكرمك يا رورا يا حبيبتى
بس أنا زعلانه أنك أتأخرتى المرادى
متكرريهاش تانى
ماشى؟؟؟
Sou
هههههههه
ليه يا سوسو يا حبيبتى زعلانه
مهوة أنا لو قلت كل الكلام مرة واحده
حكون بأعلن أغلاق المدونه
عشان خلاص مبقاش عندى كلام
على العموم أتطمنى أنا أصلا قربت على أيامى الحاليه اللى أنا عيشاها دلوقتى
وكلها كام بوست وتعيشوا معايا لايف
مباشرة
على الهواء مباشرة يعنى
ههههه
وعجبنى جدا جدا تعبيرك لما قولتى
طول ما أحنا ماشيين فى الحياه بنتعلمم و بنتجرح و لولا الجرح ماكناش هنتعلم
بجد كلمات مختصرة لكن عميقه جدا جدا
ٌR
Rara
فعلا يا رارا أنا عملت كده
ومتأكده أن لا أنا كنت خير ليه ولا هوة كان خير ليا
والحمد لله
على كل شىء
بس الواحد ممكن يتجرح من كلمه أو موقف حصل
بس الحمد لله
أنا أستفدت كتيييييير أوى من التجربه ديه
وأنتى بتغيبى كده وبترجعى
عشان خاطرى أوعى تغيبى تانى
ماشى يا رورا؟؟
وربنا يكرمك ياارب ويسعدك
صباح الصباح
أولا
نورت مدونتى
فعلا سعيده بمرورك
ثانيا أتنمنى أن تكون قد سعدت بهذا المرور
ثالثا أتمنى أنها متكونش أخر زيارة
رابعا
كنت سألت ليه البروفيل فيه شجن
أعمل أيه مهو من اللى بشوفه
حياتى الحمد لله
بس يعنى حصلى مواقف كتير خلتنى أكون زعلانه
بس الحمد لله
أنا ربنا كرمنى أخر كرم
وعوضنى خير فى حاجات كتييييير
ومرسى على مرورك
السلام عليكم
ايه بس المدونة الجامدة ديه,,,انا اول مرة ادخل بس بجد عجبتنى اوى ...و ربنا يوفقك
اما عن الموضوع الجامد اوى اللى انتى بتتكلمي فيه ...فانا لم اتفاجأ بيه على الاطلاق لان ببساطة الولاد بطبعهم انانين جدا وباصين دايما على عيوبنا وناسيين نفسهم خالص يعنى عايزينك تبقي جامدة جدا فى كل حاجة وهو يبقى بنى ادم هايف وضعيف بس ياعينى فاهم نفسه انه محصلش ...اقول ايه مساكين......
اه نسيت اقولك على حاجة مهمة,,,,
اجمل حاجة حصلت ذي ما بتقولى انك قعدتى مع ربنا ...وما اقربه
ولتنطلقى فيما سيأتي فانه حتما اجمل مما مضى ,,
عارفة انا نفسي برده انطلق كده ذيك فى الشغل بس الحقيقة عندي بعض المعوقات ان شاء الله تخلص قريبا ....ياريت تدعيلى,,,
وبمناسبة الحديث على الشغل فى محاضرة جامدة جدا فى جمعية زدني عن interview skills يوم الاثنين القادم
باااااااااااااااااي
أمه الله
بجد سعدنى جدا تعليقك
وكلامك الراقى
وفكرك
وعندك حق فى كل كلمه
ومرورك أسعدنى وشرفنى
ولو فعلا المدونه عجبتك لازم تزورينى على طووووووووول
ماشى؟؟؟
أمه الله
بجد سعدنى جدا تعليقك
وكلامك الراقى
وفكرك
وعندك حق فى كل كلمه
ومرورك أسعدنى وشرفنى
ولو فعلا المدونه عجبتك لازم تزورينى على طووووووووول
ماشى؟؟؟
سوسا ومودي
موضك حلو أوي
وأهم حاجة في الموضوع إن الواحد
يعرف حيقة اللي قدامه
شكرا مرة تانية على الموضوع
aaya
سوسا............. انا اول زياره و البوست بتاعك ده بيجسد معاناه كل البنات المصريات الى فى سن الزواج وبيتقدملهم عرسان يخشو البيت مره واتنين وبعدين يتبين عدم جديتهم لكن كما تدين تدان وربنا مبيسبش حد ولازم تعرفى يا جميله انى مش معنا انى الشاب ملتحى و باين عليه ظاهريا انه متدين انه كويس وجاد وده عن تجربه شخصيه وربنا يكرمك ان شلء الله بحد ظاهره زى باطنه واحسن حاجه انك فعلا تركزى فى مستقبلك المهنى و ربنا يكرمك فيه ......تحياتى
الحمد لله انك عرفتى الناس دى على حقيقتها من قبل ما يحصلش اى شىء , وبعدين ياستى دا انتى بوستى ايدها وقالت عليكى كلام غلط , اومال بقى لو كنتى عيشتى معاها بقى , كانت هتعمل ايه ؟
وبعدين يابنتى دا جاى يقول لباباكى انا مش معايا فلوس رغم انك قولتى إن باباكى ما ضغطش عليه فى الطلبات , ايه كان عايزك انتى تعملى كل حاجة شقة وجهاز وشبكة ؟
فيه حاجات يابنتى كانت واضحة اودامك بس انتى ماكنتيش واخدة بالك منها , لجوئك لربنا هوه اللى حماكى منها الحمد لله
يلا ياستى ربنا يوفقك ويجيلك واحد ملتزم وكويس ومامته تكون كويسة بجد
اية دة دة اخر واحد
انا قريتهم كلهم
اسلوبك روعة
بجد بجد بجد
فيه تشويق عجيب
ماشاء الله
دة اولاً
..............
ربنا يعزك يا رب و يوفقك في مستقبلك
بالنسبة للبوست بتاع مودي اللي اداكي ظهرة
علي فكرة
معنى انه يديكي ظهره و ميروحش الاوضة دة إنه اتجرح و حس انه مش هيقدر يقدملك حاجة
فيه ناس كدة
بتصمت لما تحس ان الحاجة اللي بتحبها هتضيع ومفيش في ايدها حاجة
بدل العياط و النظرات
عشانك كمان
عشان ميثقلش علي كاهلك
معنى ان كل مرة بتروحي الاوضة و هوه يروح وراكي
او هوه يروح وانتي تروحي وراة
و انه لما المرة دية
بالذات ميروحش
معناه انه فيه جواه حاجة اتكسرت ساعتها
.............
بوست اشرف بقة اللي هوه بتاع انهاردة
انا صراحة مبفهمش الناس خالص
امي تقولي دة كذا و كذا
و هتكتشفي
وانا اقولها لأ دول طيبين
سبحان الله
معنديش فراسة في الموضوع دة
منتظرة باقي المذكرات
و ربنا يعزك يا رب
سلام
ايه يا سوسا عايز جديد اصوت سيبك من اشرف بقى
يالهووووووووووووووووووووووووووى
سوسا
ازيك يا بنوتة يارب تكونى بخير
بصى انتى بجد شدتينى جدا بس فى حاجة وقعت منك ازاى انقلب بالشكل الكبير دا اكيد فى شئ فى النص حصل
مش مجرد انه قال انه مش معاه فلوس
فبصراحة الموضوع كدة مش متكامل
ياريت تفسرى اكتر
بس اسلوبك حلو جدا وسلس
انتي حديد يا سوسا
خالو بيقولنا كده عشان يحسسنا ان احنا لسه اقويا وجامدين وبنستحمل وبنتحمل
حديد يا سوسا حديييييد
مها ميهوووو
بجد انتى عانيتى جدا.. وانا حاسس بيكى اوى لانى مريت بتجربة مشابهو اوى اوى للى حصل لك.. والدنيا كلها اتطربقت وبقيت بامشى فى الشارع دموعى جوا عنيا.. فاقد الاحساس فاقد الشعور.. قلبى بيتقطع كل مايجى جوايا صورتها.. بس الحمد للة انتى لقيتى نفسك تانى.. وتاكدى انك مش كنتى غلطانة.. بس برضة الطيبة الزيادة تودى صاحبها ورا الشمس .. وافتكرى اننا مش عايشين مع ملايكة .. احنا بشر
دمتى بكل ود
انتى فين اظاهر ان موضوع اشرف ماثر عليكى
وحشتينى اوى اوى جدا خالص
اشرف ده طول اوى عايزين حاجة جديدة بقى وحشتينى
وحشتينى اوى اوى اوى
اكتبى بقى
كل سنة وانتى طيبة
كل سنة وانتى طيبة
رمضان كريم
كل سنه وانتي طيبه
انتي فين من زمان
منتظره جديدك
إرسال تعليق